Wysłany: 06-07-2009, 22:37 Projźba do administratorów
Zoucni Panie Administratorze,
bardzo Wous chcã pochwoulić za to szumny fórum czyszecky gminy. Mało wiela chtorou gmina mou na Ślónsku taky forum, kandy se tak mocka pisze po ślónsku jak u Wous. Za to se Wóm nouleży wielkou chwoulba.
Ale bydźcie taci dobrzi a nie gorszcie se na mie, ejźli przidóm tyż pourã słów krityki. Jou rozumiã, że każdi pisze po ślónsku jak poradzi, tóż se nie dziwujã, kiej ta ślónskou mouwa je czasym dojś pomiyszanou. Jak chto priwatnie pisze, to je jego sprawa. Jednak wierzã, że administratorzi powinni se wystarać o to, coby ty głowny napisy były napisany perfekt po ślónsku, a eszcze lepszi po czyszecku. Tóż bardzo bych Wous prosiył, cobyście poprawiyli ty felery:
naszoł wjeś --> nasza wiejś
Czyszecky Ślónskie Forum ---> Czyszecky Ślónsky forum
Mie se zdou, że taky fora powinny jednak se ku tymu prziczynić, coby młodzi ludzie rzóndzili po ślónsku prawie, a ejźli czygo z dóma nie wyniejśli, mógli se tukej douczyć. My w Dandze bardzo se bojymy, że takou felernou, rozwodniónou ślónskou mouwa se bydzie yno corouz to barzi rozszyrzać a szumnou mouwa naszich starzików zostanie prandko zapómnianou.
Pozdrouwióm
Grzegorz Wieczorek, Touwarzistwo Piastuwaniou Ślónsky Mouwy DANGA w Czyszkach
Fajnie, ześ sam tysz cos napisou, a nawet krytyka je mile widzianou.
Fyjlery na stronie głowni idzie poprawić, zaś jo do ty pory wcale nie wiedzioł, że to som fyjlery. Za mojich czasów to musiołech pisać jyno po polsku, a w doma i na przerwach godali my dycki po swojymu.
Z tom całom pisowniom to som zowizou samy szopki, bo jak se tak szkryflauo na forum kaj se trefiyło jeszcze ludzi z Bytomiou, Katowic, Gliwic, Tarnowskich Gór - to kozdy z nich pisze inaczi.
A co do tygo, że nasze forum je richtig prowadzone po slonsku to je prouwda. Mało kaj sie taky trefi co by było jyno w gwarze szkryflane. Z tygo my wszyscy do kupy se radujymy.
Mom nadzieja, ze sam z nami troszka poszkryflousz i to nieje twoj ostatni post
_________________ Serwus Gość! Lubisz podziwiać fotki? Jak ja to zapraszom na GALERIO I I GALERIO II
Christian Uzależniony od forum fotoreporter obieżyświat
My niy muszymy zgaduwać abo se domyjślać, jak se padou po czyszecku: "naszoł wieś" abo "nasza wiejś"... Styknie se opytać starich ludzi a już bydziecie wszysko wiedzieć. My w Dandze już tyn "fach" tysiónc razi przeroubiali, tóż poleku każdi z nous to wiy na spamiyńć.
Ale zaimki dzierżawczy, co odpowiadajóm na pytaniy CZYJA? majóm dycko kóńcówkã -a.
Moja baba, twoja cera, nasza wiejś, wasza łónka, Bobikowa (!) studoła. To, że se tyn typ zaimkowi miyszou z typã przimiotnikowim, to je blank nowy zjawisko - tak rzóndzóm yno ci, co już w dóma nie używajóm ślónsky mouwy tak, jak jejich starzikowie. Naukowcy padajóm ónymu zjawisku "hiperpoprawnojść", bo niechtorim zdou se, iże ta kóńcówka -ou je barzi ślónskou, tóż wciepujóm jóm wszandy, a nawet tam, kandy ji nie powinno być.
Jyno wele Katowic i lecykandy pod Cieszynã rzóndzi se "naszo" abo "waszo" ale w kojzielskim kryjsie, tak jak bezmała na całim Ślónsku, nigdy przenigdy.
Drugou reguła je takou, że przed "ś" i "ź" dycko se wymouwiou w Czyszkach "j": wiejś, szejś (=sześć), niejsie (niesie), wejź (=weź), lejzie (=lezie), Kojźly atd.
Wybouczcie mi, że tak rozwlykle o tim piszã. Bardzo bych bół tymu nieroud, kiejbyście se pomyjśleli, iże chcã se wymóndrzać. Ale jou chcã jyno Wóm to przekouzać, coch se sóm nauczył - bo bez taky nauki nasza mouwa nie przeżyje. Tyż ślónskou mouwa mou swojã gramatikã - możno że óna nie je nikaj opisanou, ale to nie znaczi, że niy ma żoudny normy i że każdi śmiy rzóndzić i porzónd miyszać, co chce i jako chce, i że to dycko bydzie eszcze po ślónsku. Sami widzicie: jedyn to przeónaczy a zarouz drudzi se bieróm przikłoud z tego i za pourã lout wszyscy rzóndzóm opacznie. We wieku internetu taky "innowacyje" szyrzóm se z prandkojścióm światła, bo małowiela chto mou tã mouwã eszcze we krwi i używou jy każdi dziyń. Za to każdi łowi se w internecie to, co mu se podobou abo zdou barzi ślónsky - na starõ tradycyjõ swojygo dialektu żoudyn tam pozór nie douwou.
Podug mie nie je to tak ważny, jaky ortografijy używoucie, bo literki, piski abo houczyki to je rzecz myni ważnou. Moc ważniyjszy je, coby, co tymi literkami piszymy, było napisano prawie, tzn. blank po naszymu.
Pozdrouwióm piyknie
Szczyglik
Christian Uzależniony od forum fotoreporter obieżyświat
Nie możesz pisać nowych tematów Nie możesz odpowiadać w tematach Nie możesz zmieniać swoich postów Nie możesz usuwać swoich postów Nie możesz głosować w ankietach Nie możesz załączać plików na tym forum Możesz ściągać załączniki na tym forum
FAQ
Szukaj
Użytkownicy
Grupy
Rejestracja
Zaloguj
Album
Download
